Að kasta steinum úr glerhúsi!

Sjálfstæðismenn eru semsagt á móti sérstöku Stjórnlagaþingi?

Sjálfstæðismenn vilja sem sagt að þingmenn fari í þá umræðu og það þarfaverk að koma með tillögur að breyttri stjórnarskrá?

Eru Sjálfstæðismenn búnir að gleyma hversu hrikalega kitlum árangri það hefur skilað að láta þingmenn fjalla um breytingar á stjórnarskránni?

Í síðustu nefnd undir formennsku Jóns Kristjánssonar komust flokkarnir á þingi að samkomulagi um eina breytingu. Og sú var ekki merkileg.

Finnast Sjálfstæðismönnum þetta mikill kostnaður við að færa Stjórnarskrá Lýðveldisins til nútímans. 1.5. milljarður. Þar inni eru væntanlega laun og rekstrarkostnaður við Stjórnlagaþing í 18 mánuði?

Eru þetta ekki sami flokkur og hafði forgöngu um einn mesta laga ósóma sem samþykkt hefur verið á Alþingi, reyndar af öllum flokkum. Nefnilega eftirlaunafrumvarpið sem tók 4 ár að breyta aftur en var samþykkt í skjóli nætur rétt fyrir þinglok.

Er þetta stjórnmálaflokkur sem finnst tíma Alþingis illa varið að leggja til að kosið verði til stjórnlagaþings?

Eru menn ekki að kasta steinum úr glerhúsi?


mbl.is Stjórnlagaþing fyrir 1,5 milljarða?
Tilkynna um óviðeigandi tengingu við frétt

Þverpólítískur vilji til að halda áfram í Helguvík.

Það verða þá aðrir flokkar sem ekki eru andsnúnir atvinnuuppbyggingu á Suðurnesjum að greiða atkvæði með þessu frumvarpi Iðnaðarráðherra.

Afstaða VG hefur löngum verið ljós í þessu máli og varla við því að búast að þau færu að skipta um skoðun. Hvort sem okkur finnst afstaðan gáfuleg eður ei.

Hitt er annað mál að það verður vafalaust á brattan að sækja fyrir frambjóðendur VG að hljóta náð fyrir augum atkvæðanna í Suðurkjördæmi allavega Suðurnesjahlutann sem er langfjölmennasti hluti kjördæmisins.

Flest allir íbúar á Suðurnesjum styðja álversframkvæmdir og er sá stuðningur þverpólitískur. Hér er mikið þarfamál á ferðinni enda Suðurnesjamenn varla búnir að býta úr nálinni eftir brotthvarf hersins og þau hundruð vel launaðra starfa sem þá hurfu.

 


mbl.is Steingrímur á móti Helguvík
Tilkynna um óviðeigandi tengingu við frétt

Bráðnauðsynlegur óþarfi!

Vaknaði við gamalkunnan þyt í morgun þegar að F-16 frá danska flughernum hófu sig á loft af braut 11 á Keflavíkurflugvelli. Beint yfir byggðina og út á Faxaflóa.

Þetta gerðist nær daglega í tæp 50 ár þegar að kaninn var á vellinum, oft tvisvar á dag og í eina tíð fóru 18 vélar á loft í einu, tvær og tvær saman og oftast í miðjum fréttatíma í hádeginu. Þá var oft bölvað yfir helv...hávaða.

Hávaðinn í þessum druslum er kannski aðeins minni en í gamla daga enda bara með einn hreyfil.

En hvaða tilgangi þetta þjónar fyrir íslenskar landvarnir? Skiptir harla litlu máli fyrir varnir landsins hvort að hér séu einhverjar orrustuflugvélar einn og einn mánuð.

Lít frekar á að þetta sé atvinnuskapandi fyrir Suðurnesin.

Allavega barina!

 


mbl.is Dönsku orrustuþoturnar mættar til eftirlits
Tilkynna um óviðeigandi tengingu við frétt

Sjálfstæðisflokkurinn hefur aldrei beitt ofbeldi!

Eru nú Sjálfstæðismenn orðnir boðberar friðar og kærleika í samfélaginu?

Er fyrrverandi forseti alþingis gjörsamlega úr takti við samfélagið?

Það var þjóðin sem mótmælti fyrrverandi ríkisstjórn. Sturla getur kallað það skríl og að beitt hafi verið bolabrögðum en stjórnin sem sat við völd og Sturla sótti upphefð sína til sem þingforseti var handónýt skrípi sem að hin dáði duglausi formaður hans stjórnaði.

Gjörsamlega óhæfur til slíks verks.

Ef Sturla heldur að flokkurinn hann sé boðberi kærleiks og friðar þá má minna hann á að það var hann og flokkurnin hans sem studdi innrásina í Írak.

Það var flokkur hans með BíBÍ sem dómsmálaráðherra og með fulltingi núverandi lögreglustjóra í Reykjavík sem bönnuðu friðsömum Falun Gong liðum að mótmæla þegar Kínverski fjöldamorðinginn kom í boði þessa friðelskandi flokks sem Sturla tilheyrir.

Sjálfstæðisflokkurinn hefur aldrei beitt ofbeldi né bolabrögðum!

NOT


mbl.is Deildu hart í þingsal
Tilkynna um óviðeigandi tengingu við frétt

Valfrelsi/Valhelsi

Löngum hefur það fylgt Sjálfstæðisflokknum, sem í orði hefur boðað frelsi en oftar en ekki staðið í vegi fyrir sjálfsögðum breytingum með íhaldssemi sinni. það er löngum ljóst að Sjálfstæðisflokkurinn er fyrst og fremst valdablokk sem virðir frelsi einstaklingsins svo lengi sem hann fer ekki á skjön við valdaklíkuna í flokknum. Stærsti vandi Sjálfstæðismanna, og þar með þjóðarinnar á meðan hann fór með völdin var gunguháttur Geirs Haarde. Með aulaskap sínum á hann stjórna þátt í því hvernig komið er fyrir íslenskri þjóð.

Nú er svo komið að nefndirnar sem flokkurinn kom á laggirnar í kjölfar efnahagshrunsins eru enn því marki brenndar að eiga helst ekki að fjalla um neitt sem skiptir máli. Aðeins að horfa til framtíðar bull og þvaður kemur upp úr fráfarandi formanni. Það er hlutverk annarra að líta til baka.

Sannleikanum er hver sárreiðastur og þannig líður vafalaust Haarde nú um stundir. En í hroka sínum getur hann ekki viðurkennt mistök sem hann og flokkur hans hafa gert.

Ekki einu sinni til að læra af þeim og sjá til þess að á þessum mistökum má læra. Og enn er hann við sama heygarðshornið og leggst gegn sjálfstæðum breytingum á kosningakerfinu okkar.

Er slíkum flokki treystandi?


mbl.is Leggja fram frumvarp um persónukjör
Tilkynna um óviðeigandi tengingu við frétt

Gengur Ingibjörg Sólrún næst guði?

Án nokkurs vafa munu margir núverandi þingmanna ekki ná viðunandi árangri í komandi prófkjörum flokkanna. Og þarf varla að koma nokkrum manni á óvart. Ef að líkum lætur þurfa þeir allmargir að finna sér ný störf og fátt um fína ríkisbitlinga nú um stundir.

Það vekur eilitla furðu hversu svakalega billega Ingibjörg Sólrún virðist ætla að komast í gegnum þetta allt saman hjá sínum flokki. Hún er í slíkri guðatölu meðal Samfylkingarfólks það má helst bara ekki gagnrýna konuna. Hún er eins óskeikul og Faróarnir. Stendur næst guði, en þó aðeins meðal harðasta kjarna Samfylkingarfólks. Ég er hræddur um að pöppullinn þarna úti gæti verið á annarri skoðun.

Ingibjörg Sólrún og hennar flokkur voru kannski aðeins við völd 18 mánuði fyrir bankahrun. En hún og hennar flokkur voru við völd þegar allt hrundi og hún og hennar flokkur ber ábyrgð á því hvernig staðið var að málum eftir það mikla hrun. Setningu neyðarlaga og kaosins eftir það allt saman.

Mótmælin á Austurvelli svokölluð búsáhaldabylting og slagorðið ,,Vanhæf ríkisstjórn" beindist Ingibjörgu Sólrúni og hennar flokki. Það að hafa myndað nýja ríkisstjórn og gert Jóhönnu Sig að forsætisráðherra minnkar ekki hennar ábyrgð. Það dugar ekki endalaust fyrir Samfylkingu og Ingibjörgu Sólrúnu að kenna öðrum um.

Það leiðir líka hugann að því hversu fáránlega aumingjalega þessi ríkisstjórn hefur tekið á málefnum yfirskuldsettra heimila og fyrirtækja. Hvar er margumrætt frumvarp dómsmálaráðherra um skuldaaðlögun og breytta gjaldþrotalöggjöf? Fast í nefnd?

Sú lagabreyting er hin eina sanna neyðarlöggjöf sem fólkið í landinu þarfnast.

En um slíka lagabreytingu er varla sátt á hinu auma Alþingi nú um stundir og enn ropa frjálshyggjumenn hátt um að alls ekki megi koma slíku óreiðufólki til bjargar.

En við málssvara slíkra hugmynda og þá málssvara nýfrjálshyggjunnar sem hæst hrópuðu á torgum og tóku þátt í trylltum dansi gjörspilltra bankamanna og vafasamra viðskiptahátta veruleikafyrra útrásarvíkinga er bara eitt að segja:

Skammist ykkar til að halda kjafti. Nægur er skaðinn á íslensku þjóðlífi eftir ykkur. Látið aðra um að bjarga þjóðinni úr þeim hremmingum sem þið og ykkar verk unnuð íslenskri þjóð


Símalaus forseti á faraldsfæti

Ég sá ekki viðtalið við Davíð Oddson. Tók bíóferð með minni heitt elskuðu fram yfir. Sáum Óskarsverðlaunamyndina Slumdog millionaire. Bókin var miklu betri en myndin.

 Það er annars ótrúlegt hvað gamli keisarinn hefur mikil áhrif á íslenskt þjóðlíf. D.O getur verið svo svakalega trúverðugur þegar hann talar að maður trúir honum eins og skot. Smástund!  

Þetta er maður sem hefði orðið frábær trúarleiðtogi. Hefði getað rakað saman peningum og fengið fullt af liði til til að gera allt fyrir sig. Hann fór reyndar aðra leið, þá pólítísku en það er fullt af liði þarna úti sem lítur á hann sem andlegan leiðtoga og trúir öllu sem hann segir.

Nú skiptir það engu máli lengur hann er farin úr Seðlabankanum og kemur aldrei aftur. Nú ætti hann að setjast við skriftir og semja sálma. Er ágætur rithöfundur.

Nú fjarar heldur betur undan Bessastaðabónda. Tæpur meirihluta aðspurðra í skoðanakönnun hefur ekkert traust á kallinum í embætti forseta. Skrýtið!.

Karlinn hagaði sér kannski ekki beint forsetalega í partýinu með útrásarsukkliðinu. Djammaði aðeins og mikið og nú hellist þynnkan yfir. Engar einkavélar og enginn Elton John.

Held að hann ætti að láta fara eins lítið fyrir sér og honum er unnt. Vera heima og klappa hundinum og spila lomber við Örnólf forsetaritara.

Eða elta Dorrit til London. Símalaus.


Vona að refsivondur kjósenda bíti þá í rassgatið!

Það sýður í mér bræðin vegna aumingjaháttar og getuleysis þingmanna. Hvað er eiginlega í gangi í þinginu? Hvers vegna geta þessir 63 fulltrúar landsmanna ekki sameinast í að reyna leysa mál í stað þess að vera sífellt í andsk....sandkassaleik?

Í gær voru stöðugar fréttir af ákvörðun eins þingsmanns Framsóknar sem áleit það skildu sína að bíða eftir skýrslu frá ESB til að geta tekið ákvörðun um nýtt frumvarp um Seðlabanka Íslands.

Og hvað? Það verður allt vitlaust.

Vissulega er þörf á breytingum í Seðlabankanum en varla svo svakalega að það þurfi að leggja niður störf heilan dag vegna þess að beðið er eftir einni fjandans skýrslu um málið. Á ekki skýrslan að koma á morgun, miðvikudag?

Var ekki hægt að einhenda sér í einhver brýnni mál á meðan?

Hvar er frumvarp dómsmálaráðherra sem á að taka á brýnasta vanda heimila og fyrirtækja í landinu? Hefði ekki verið kjörið að ræða og samþykkja það frumvarp í gær í stað þess að vafra um vinnustaðinn sinn heilan dag og búa til einhverja dramatík vegna sjálfstæðra vinnubragða eins þingsmanns?

Það er alveg á hreinu af minni hálfu að fæstir núverandi þingmanna verðskulda það að vera ráðnir til starfa að afloknum kosningum. Þetta er að obbanum til ósjálfbjarga þurfalingar sem ekkert eiga að vera blanda sér í þjóðmálin. Hugsa fyrst og fremst um afturendann á sjálfum sér að og passa sig á að fylgja einhverjum helv...flokksaga.

Ef að aðrar hvatir liggja ekki að baki ákvörðun Höskuldar Þórhallssonar en að fylgja sannfæringu sinni þá tek ég ofan fyrir honum fyrir sjálfstæð vinnubrögð.

Betra væri að fleiri þingmenn hefðu bein í nefinu til þess.

Sjálfstæðismenn á þingi ætti að ropa minna um störf þingsins nú á tímum. Þeir stjórnuðu allri umræðu á þingi eftir setningu neyðarlaganna og þá sátu þingmenn sjálfstæðisflokksins, klóruðu sér í naflanum og borðuðu í nefið og fannst tíma alþingis best varið í að ræða helst ekkert eða ómerkileg lýðskrumsmál eins og að koma bjór í 10-11.

Nú ættuð þeir að hugsa um það sem kemur út um túlann á þeim, afturhalds þingmannsdruslur sem engu hafa áorkað.

Eitt er á hreinu: Mínu atkvæði verður ekki sóað á iðjuleysingja sem ekkert nenna að gera og hugsa helst um að koma sér í nógu þægilegt sæti fyrir næstu kosningar.

Nú er komin tími á hreinsanir. Frekar 63 nýliða sem aldrei hafa sest á þing áður frekar en einn aflóga þingmann með reynslu.

Vona að refsivondur kjósenda bíti fast í rassgatið á þeim þingmönnum sem eiga það svo sannarlega skilið!

 


Misgáfuleg framboð!

Þeir hellast hver á fætur öðrum úr lestinni núverandi þingmenn sem ekki ætla að gefa kost á sér í prófkjörum eða forvali. Þar kemur sumt á óvart en annað ekki.

Það kemur ekki á óvart að Lúðvík Bergvinsson gefi ekki kost á sér. Það kemur aftur á móti á óvart að Gunnar Svavarsson gefi ekki kost á sér.

Það kemur mér ekki á óvart að Sigmundur Davíð Gunnlaugsson fari fram í Reykjavík norður. Þar virðist fara baráttumaður sem er fylgin sér. Einhverjar raddir hafa verið að spyrða spillingarorðið sem farið hefur af Framsóknarflokknum, sannarlega verðskuldað yfir á þennan nýja formann þeirra og benda á föður hans sem gróft dæmi um pólitíska spillingu. 

Förum nú ekki að blanda erfðasyndinni inn í þetta. Gefum honum möguleika á að sanna sig sjálfan.

En ég hef verið að velta fyrir mér kandídötum Sjálfstæðismanna í komandi prófkjöri þeirra í suðurkjördæmi. Nokkur ný nöfn komin fram Guðbjörn Guðbjörnsson, Árni Árnason og Ingigerður Sæmundsdóttir og Ragnheiður Elín Árnadóttir, fyrrverandi aðstoðarmaður Haarde ef ég man rétt.

Svo eru það núverandi þingmenn. Kjartan Ólafsson, HVER? Huldumaður frá Selfossi!                   Einn af þeim sem sagður er vinna svakalega vel fyrir flokkinn er er allavega nú um stundir MR. NOBODY.

Árni Johnsen, enn á því að hann eigi erindi á þing.

Og svo er það fyrrverandi fjármálaráðherra sem óhikað ætlar að bjóða sig fram á nýjan leik Gjörsamlega frávita vitlaus ákvörðun hjá honum og ber vott um hversu gjörsamlega úr takti við allan almenning þessi maður er.

Get ekki ímyndað mér að það sé mikil eftirspurn eftir honum um þessar mundir.


Áttahundraðmetrahlaup áttavilltra!

Ótrúlega pínlegt að sjá hversu óhöndulega Sjálfstæðismenn reka sitt stjórnarandstöðuhlutverk á Alþingi. Þeir eru eins og þátttakendur í áttahundraðmetrahlaupi áttavilltra. Rífast og skammast og það er greinilegt eitthvað óyndi í þeim sem bætist ofan á prófkjörsskrekk, þeirra sem ætla á annað borð að sækjast eftir sæti á framboðslista.

Alveg sérstaklega finnst mér ánægjulegt að sjá hversu góðan tíma Sigurður Kári Kristjánsson hefur  til blaðaskrifa og nú vantar ekki hugmyndirnar hjá honum.

Birgir Ármannsson fer mikinn í gagnrýni sinni á ríkisstjórn og nú síðast hafði hann allt á hornum sér varðandi hugmyndir manna um stjórnlagaþing. Vildi meina að það væri argasta vitleysa að kjósa samhliða Alþingiskosningum sérstakt stjórnlagaþing. Ég skyldi ekki betur en að honum fyndist alþingi vera lítilsvirt að kjósa ætti sérstakt þing til að fjalla um breytingar á stjórnarskránni. Ansi mikið menntaskóla Morfíslegt hjá Birgi.

Er það ekki einmitt mergur málsins. Allir aðrir en þingmenn eiga að fjalla um stjórnarskrárbreytingar. Hvað gerir þá eina hæfa til að fjalla um slík mál? Ekkert!

Ekki hefur nú heldur vel tekist til þegar að þingmenn hafa skipað nefndir til að fjalla um slíkar breytingar. Margar nefndir en lítill árangur.

Ég ætla rétt að vona að kosið verði til stjórnlagaþings samhliða komandi Alþingiskosningum. Og Það þing leggi síðan nýja stjórnarskrá fyrir landsmenn til samþykktar eða höfnunar.

Það er rík krafa þjóðarinnar, þeirrar sömu og kaus Birgi Ármannsson og aðra alþingismenn á Alþingi.


« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband