Hvað fær menn til að rífa sig á lappir kl. 6 á páskadagsmorgun?

Reif mig upp úr bælinu kl. 6 í morgunn og henti mér sturtu og byrjaði að humma eins og brjálæðingur. Gleypti í mig seríósi og var farin í mínum ,,Sunday best" út úr húsi fyrir kl. 7. Og við erum að tala um sjö árdegis á páskadagsmorgun þegar allir venjulegir menn láta sér ekki einu sinni detta í hug að hlunkast á lappir,þá æða meðlimir í kirkjukórum í messu og til að þetta sé nú allt eins og Kantorinn vill þá mæta menn klukkutíma fyrr. Messan hefst kl. 8 stundvíslega.

Enda gekk þetta allt eins og í sögu. Hátíðarsvör séra Bjarna, prestarnir báðir Sr. Skúli og Sr. Sigfús og ég tala ekki um einsöngvarann í Innegiamo, Bylgju Dis Gunnarsdóttur, hún var frábær! Látum það eiga sig fyrir bassana að byrja að rymja þetta eldsnemma að morgni en fyrir sópran og tenór er þetta aðeins meira mál. Hvað þá sópran einsöngvara sem þarf að öskra þetta og varla komin fótaferðatími.    Hún hefur ábyggilega verið vöknuð kl. 5 í morgun til að vera komin í gírinn. En hún leysti þetta óaðfinnanlega að mínu mati og ég fékk gæsahúð í lokatónunum.

Ætla ekki að ímynda mér hvernig kirkjugestum leið þarna niðri en ég stóð aftast á söngloftinu og fann hughrifin hrýslast um mig.

Ætli svona venjulegur maður sem hefur sungið með ýmsum kórum í gegnum tíðina komist mikið nær almættinu en að heyra svona unaðslegan söng að morgni dags með frábærum félögum í kirkjukór Keflavíkurkirkju en þennan morgunin.

Allavega finnst mér tímanum undanfarna vikur hafa verið vel varið þegar að afraksturinn er svona góður.

Gleðilega páska öll og hafið það sem best.