Látum þá gjamma!

Er Kjartan að vísa til sama sómakærra fólksins og hefur sannarlega ofboðið átroðsla Sjálfstæðisflokssins  síðustu 18 ár. Flokkur sem hefur ítrekað gengið svo langt í einkavinavæðingu og útdeilingu embætta til flokkshollra varðhunda að fólki hefur legið við köfnun.

Er enginn takmörk fyrir því hversu langt þessir skósveinar lýðsskrums og pólítaks ofbeldis eru tilbúnir að ganga, Kjartan Gunnarsson og Hannes Hólmsteinn til varnar goðinu DO.

Látum þá gjamma. Hundur sem lokið hefur hlutverki sínu á lítið annað en gjammið eftir!

Missum ekki sjónar að eitt mesta baráttumál þjóðarinnar er að losna við spillingu í öllum stjórnmálaflokkum. Ekki síst þeirri spillingu og vinavæðingu sem Kjartan þessi hefur staðið fyrir allt og lengi og aldrei þurft að svara fyrir. Makað krókinn í skjóli Sjálfstæðisflokksins.

En varla mikið lengur.

Pólitískar hreinsanir og ofsóknir

Gengur Jón Ásgeir á öllum?

Þær eru óskiljanlegar ásakanir stjórnarformanns Baugs um að DO í Seðlabankanum hafi sett það sem skilyrði fyrir afsögn sinni þá verði eitt stærsta fyrirtæki á Íslandi, Baugur, með starfssemi um víðan völl að hætta starfssemi og bankaleyfarnar að reka það í gjaldþrot. Ekki bara Landsbankaleyfarnar heldur líka Glitnisleifarnar líka. Og nú eru Bretar orðnir æfir yfir öllum þessum gjörningi og kólnar enn sambúðin við Breska ljónið. Fyrirgefið en það er eitthvað mikið að svona málflutningi. Er Jón Ásgeir að halda því fram að á síðustu dögum DO í embætti Seðlabankastjóra hafi ríkisstjórn og forsætisráðherra, skilanefnd Landsbankans og Glitnis ákveðið sem svo jú það er svo mikill akkur í því að losna við kallinnúr  Seðlabankanum að hann geti yfir höfuð sett svona kröfur og það í gegnum síma, því maðurinn er búin að vera erlendis eftir því sem fjölmiðlar segja okkur. Er Jón Ásgeir að halda því fram að það séu handahófsákvarðanir lánadrottna gegn Baugi sem urðu þess valdandi að fyrirtæki hans óskaði eftir greiðslustöðvun sem oftast nær er undanfari gjaldþrots. Ég verð að játa það hér og nú að ég hef lítið sem ekkert vit á svona starfssemi sem Jón Ásgeir hefur rekið og ég mætti ekki í sömu röð og hann né sama dag og Skaparinn úthlutaði viðskiptavitinu en eitt veit ég þó: Að ef maður skuldar einhverjum eitthvað þá verður maður óhjákvæmilega að borga skuldina einhvertíma. Það dugar mér ekki að slá sífellt fleiri lán og reyna að kaupa fleiri fyrirtæki út á krít. Á endanum gefst sá sem lánar upp á ástandinu og heimtar greiðslu ellegar gengur að veðum sínum. þannig gengur það fyrir sig hjá okkur pöplinum á landinu bláa.

Ég skal játa það skilmerkilega og blygðunarlaust að eitt sinn áleit ég DO frelsara flokks og lýðs á Íslandi og greiddi honum meira að segja atkvæði á landsfundi þegar hann var fyrst kjörin formaður. Fannst hann töff leiðtogi og skemmtilegur. En ég verð einnig að játa að eftir því sem árin liðu og hann eltist í starfi og ég eltist og kannski þroskaðist þá fór mesti ástarbríminn til DO að hverfa. Nú er hann horfin og ég finn aðeins til með honum. Hann var Keisari. Nú er hann á hraðri leið með að verða falinn stjarna og fölnuð og á endanum flestum gleymdum nema hörðustu aðdáendum.

Kirkjugarðar heimsins geyma ómissandi fólk.

Frá mínu forpokuðu og dómhörðu sjónarhorni og hvað sem völdum DO kann að vera þá held ég að Jón Ásgeir sé ekki að keyra á öllum þegar hann heldur því blákalt fram að allir aðrir en hann og hans hirð eigi sök á því hvernig málum er komið í fyrirtækjasúpu hans.

Það getur bara ekki gengið að kenna öðrum um ófarir en eigna sér einum alla velgegni.

En hvað veit ég?

Tyrkneskar grátkonur....

Hlustaði á seinni hlutann af umræðum frá Alþingi nú í kvöld. Heyrði meðal annars í Bíbí fyrrum hæstráðenda í Skuggasundi. Hann grenjaði eins og Tyrknesk grátkona yfir eigin óhamingju sem er að mestu leiti til komin vegna vonsku allra annarra en hans og eigin flokks. Hann var rasandi bit yfir vonsku þingmanna að vilja ekki Lóminn Sturlu Bö sem forseta. Eins og það skipti einhverju máli hver ber bjölluna næstu daga.

Árni Sigfússon bæjarstjórinn okkar í Reykjanesbæ gaf það út í kvöld á VF.is að hann er ekki á leið landsmálin og heldur ekki í slag um varaformann Sjálfstæðisflokksins.

Það verður þá allavega einum Árnanum færra á listanum.

 

Hvar er Tryggvi?

Nú vænkast heldur betur hagur gamla Landsbanka og allra hinna . Allar skuldir skildar eftir í rústunum af gömlu bönkunum og svo bara byrjað upp á nýtt. Eru ekki 900  miljarða eignir á móti 1000 miljarða skuldum? Hvað eru menn að kvarta?

En hvar er nú Tryggvi?

Baugur í greiðslustöðvun

Æ! Hvar eru völdin mín?

Ótrúlegt að heyra Sjálfstæðismenn væla um valdagræðgi annarra. Nú á sko að reka heiðvirða og réttláta pólitík úr Valhöll. Allt týnt upp á borðið og brennuvargarnir ætla svo sannarlega að reyna að ná í sér í prik og kannski einhver atkvæði líka og ekki búnir að viðra burt brunalyktina úr jakkafötunum. Nú verður öllum meðulum beitt. Samúð, vorkunn og hörku. Búið að rjúfa innsiglið að vistarverum skrímsladeildarinnar í Valhöll og senda út herboð.

Sjálfstæðismenn skilja ekkert í að nýir stjórnarherrar vilji skipta út Forseta Alþingis. Þar sitji fyrir ágætur forseti Sturla Böðvarsson. Sannkallaður Lómur, ef út í það er farið. Flokkshollur aðgerðarleysingi úr Valhöll.

Annars er mér nokk sama hver verður Forseti Alþingis næstu 80 daga. Það undrar mig sífellt meira að þeir fyrrverandi ráðherrar Sjálfstæðisflokksins með Geir Haarde í fararbroddi skuli nú á fyrstu dögum ársins svo umhugað um heiður og störf þingsins. Þeir voru nú lítið að hugsa um heiður Alþingis þegar þeir ráku þingmenn inn í alþingi um miðja nótt á ,,split of a second"  til að þingmenn gætu samþykkt óséð og ólesið neyðarfrumvarp Haarde til bjargar bönkunum. Sömu þingmenn Sjálfstæðismanna sem ekki heyrðist múkk í, hvorki úr ræðustól Alþingis né annarsstaðar um bankahrun né annað. Jú, Sigurður Kári frjálshyggjugrúppía reyndi hvað hann gat að koma Heineken í búðirnar. Það var hans innlegg í umræðuna um hrun bankanna.

En eru þetta virkilega málefnin sem skipta máli? Hver er Forseti Alþingis?

Nei, þjóðin hefur um annað hugsa en það. En sjálfhverfir þingmenn ættu að hugsa sinn gang. Það er greinilegt að frjálshyggjan þeirra hefur gert meiri skaða en aðeins að leggja efnahagskerfi heillar þjóðar í rúst. Hún hefur einnig brenglað huga þeirra sem áttu að setja leikreglurnar.

Því verðum við að breyta?

Baugur komin í greiðslustöðvun

Samkvæmt mínum heimildum krafðist skilanefnd Landsbankans að Baugur færi í greiðslustöðvun í gær. Sel þetta alls ekki dýrara en ég keypti, en heimildin verður að teljast nokkuð áreiðanleg.

Er ekki allt í lagi heima hjá ykkur?

Forsætisráðherra skrifar Bankastjórum Seðlabankans bréf og leggur til að þeir sjálfviljugir segi af sér störfum sínum. Það ríkir um það einhugur um allt samfélagið að Seðlabankastjórarnir þrír axli ábyrgð og víki úr embættum sínum. Fjölmargir sérfræðingar á sviði efnahagsmála hafa bent á að til að öðlast tiltrú markaðarins og fjárfesta þurfi umfram allt að skipta út yfirstjórn peningamála í landinu.

Halldór Blöndal formaður stjórnar Seðlabanka Íslands, fyrrverandi þingmaður Sjálfstæðisflokksins og Forseti Alþingis, hefur ekki séð sóma sinn í að axla ábyrgð á störfum sínum í bankanum og segja af sér.

Það er öllum ljóst hve hrapalega þeim hefur mistekist í einu og öllu og jarm þeirra og gjamm um annað trúir enginn nema kannski flokkshollustu sjálfstæðismenn.

Verðbólgumarkmið Seðlabankans er 2%. Verðbólga á Íslandi mældist í lok janúar 18,7%.

Og formaður stjórnar Seðlabankans segir það jaðra við einelti að forsætisráðherra vilji skipta út, úr sér gegnum, fordekruðum,vanhæfum karlfauskum sem hafa í 20 ár ekki þurft að hlusta á neitt annað en það sem kemur úr barkanum á þeim sjálfum.

Er ekki allt í lagi heima hjá ykkur?

Yfirlýsingar jaðra við einelti

Að þekkja sinn vitjunnartíma.

Árni Matthisen fyrrverandi fjármálaráðherra lýsti því yfir í þættinum Sprengisandur á Bylgjunni á sunnudagsmorgun að hann hyggist sækjast eftir endurkjöri í næstu þingkosningum.

Er eftirspurn eftir Árna í næstu þingkosningum?

Áfram nú!

Óska nýrri ríkisstjórn velfarnaðar í störfum sínum. Hún hefur stuttan tíma til að sanna sig fyrir þjóð sem bíður og hefur beðið of lengi eftir úrræðum. Samkvæmt málefnasamningi eru það fá en að sama skapi ákaflega brýn mál sem bíða nýju ráðherranna. Nú er ekki tími fyrir karp og viðræðupólítík sem sem oft hefur einkennt vinstriflokka við völd. Það þarf að bretta upp ermar og kynna fyrir fólki alvöru lausnir á vanda heimila og fyrirtækja og umfram allt að skapa ný störf. Hefja og hvetja til mannfrekra verkefna á næstu vikum og mánuðum.

Janúar 2009

Búin að vera hreint ótrúlega viðburðaríkur janúarmánuður. Einhvernvegin bjóst ég alltaf við að þjóðin fengi nóg af ástandinu fljótlega eftir hangikjötsát og flugelda. Hef hitt mikið af erlendum ferðamönnum síðustu vikur og allir spyrja mikið um ástand mála á Íslandi. Þegar mótmælin stóðu sem hæst við Alþingi gekk ég með Þjóðverja um Austurvöll. Sá maður hefur oft komið til landsins og taldi sig þekkja landsmenn nokkuð en það sem hann varð vitni af þessa nótt fannst honum hálfóraunverulegt. ,,Er þetta virkilega að gerast"? spurði hann. Ég sagði honum að fólk væri þreytt á hægfara umbótum stjórnmálamanna og með aðgerðum sínum vildi fólk ná fram breytingum.

Það tókst. Við megum vera stolt af því. En baráttan er rétt að byrja. Hugarfarsbreyting þarf að eiga sér stað hjá allri þjóðinni. Við eigum að afla og svo að eyða, sagði amma mín svo oft við mig. Blessuð sé minning hennar. Hún talaði reyndar ekkert um óreiðumenn og skuldir.

Þjóðin knúði óstarfhæfa ríkisstjórn frá völdum með friðsömum mótmælum. Reyndar ætluðu ofbeldismenn og friðspillar að eyðileggja mótmælin en þeim tókst það ekki. Ekki síst fyrir aðgerðir friðsamra mótmælenda. Ég hef áður sagt að þeir aðilar sem tóku sér stöðu gegn grjótkastinu eru hinar sönnu hetjur mótmælanna. 

Þjóðin sýndi hversu hún er megnug! Við getum gert það aftur!  

Mátturinn er okkar!